२०७२ : जो चर्चामा रहे, जसले समाचार बनाए को को पर्न सफल भयत,,,
केपी शर्मा ओली
उखान टुक्काका भरमा विरोधीलाई तह लगाउने नेकपा एमालेका नेताबाट ‘राष्ट्रवादी’ प्रधानमन्त्रीका रुपमा यस वर्ष केपी शर्मा ओलीको कायापलट भयो । संविधान जारी भएपछिको विषम परिस्थितिमा प्रधानमन्त्री चुनिएका ओलीले मधेस आन्दोलनको व्यवस्थापन र नाकाबन्दीपछिको कालो बजारी नियन्त्रणमा सफलता नपाए पनि राष्ट्रवादको डुंगा चढेर उनी अहिलेसम्म आन्दोलनको नदिमा तैरिइरहेका छन्/
ओनसरी घर्ती
पहिलो महिला सभामुखका रुपमा ओनसरी घर्तीले इतिहास निर्माण गरिन् । रोल्पाकी माओवादी छापामारदेखि देशको व्यवस्थापिकाको सर्वोच्च पदमा पुग्ने महिलाका रुपमा यो वर्ष राष्ट्रपति विद्यादेविजस्तै ओनसरीको सफलता अर्को कोसेढुंगा मानिनेछ ।
सुशीला कार्की
२०७२ लाई भूकम्प र नाकाबन्दीजस्तो नकारात्मक कारणले मात्र नभई राष्ट्रका तीन उच्च पदमा तीन महिला पुगेको वर्षका रुपमा पनि सम्झना गरिनेछ । राष्ट्रपति भण्डारी र सभामुख घर्तीको उपलब्धिसँगै जोडिन आइपुगिन् सुशीला कार्की । वर्षको अन्त्यमा उनलाई संवैधानिक परिषद्ले देशको पहिलो महिला प्रधानन्यायाधीशका रुपमा सिफारिस गरेको छ ।
सुशील कोइराला
संविधान सभाबाट संविधान जारी गर्न सफल प्रधानमन्त्रीका रुपमा सुशील कोइरालाको नाम इतिहासमा अंकित भयो । नेपाली कांग्रेसका सभापति समेत रहेका कोइरालाको माघ २६ गते देहान्त भयो । मृत्यु पर्यन्त उनको चर्चा भने जारी रह्यो । प्रधानमन्त्री निर्वाचनमा केपी शर्मा ओलीविरुद्ध उम्मेदवार भएर आलोचित बनेका भएपनि प्रधानमन्त्रीका रुपमा कोइराला सफल मानिए ।
शेरबहादुर देउवा
पहिलोपटक प्रधानमन्त्री बनेको करिब २० वर्षपछि शेरबहादुर देउवा नेपाली राजनीतिमा फेरि एकपटक उदाए । देशको सबभन्दा ठूलो दल नेपाली कांग्रेसको १३ औं महाधिवेशनबाट सभापति निर्वाचित भएको एक महिनामा उनी पार्टी संसदीय दलको नेता पनि निर्वाचित भए । अधिकांश मानिसहरु देउवा फेरि प्रधानमन्त्री बन्ने दौडमा रहेको अनुमान गर्दछन् ।
कमल थापा
जनआन्दोलनका दोषीका रुपमा कुना पसेका कमल थापा हिन्दु राष्ट्रको बुई चढेर देशको उपप्रधानमन्त्री बन्न आइपुगे । जम्मा १० वर्षमा उनको यो फड्को ठूलो उपलब्धि थियो । परराष्ट्रमन्त्रीका रुपमा नाकाबन्दी अन्त्यसँग भारतमा उनले गरेको ‘चलखेल’लाई हेर्दै केही विश्लेषक उनलाई ‘पर्सन अफ दियर’मा मनोनित गर्छन् ।
रामवरण यादव
देशका प्रथम राष्ट्रपति रामवरण यादवले जब संविधान सभामा संविधानको मस्यौदालाई उचालेर ढोगे, त्यो ‘आइकनिक’ तस्बिर बन्यो । संविधान सभाले निर्माण गरेको जनताको संविधान लागु भएको घोषणा यादवले गरे । मधेस आन्दोलनका मागहरु नसमेटिएकाले संविधानको पूर्णतामाथि प्रश्न उठाएका भए पनि संविधान जारीकर्ताका रुपमा प्रथम राष्ट्रपति यो वर्ष समाचारमा रहे ।
राजेन्द्र महतो
र मधेस केन्द्रीत दलका नेताहरु मधेस आन्दोलन यस वर्षको ठूलो घटना थियो । र, राजेन्द्र महतो यसका चर्चित नेता । महन्थ ठाकुरजस्ता वरिष्ठ नेता र उपेन्द्र यादवजस्ता मानिएका नेताहरु भए पनि आन्दोलनको अनुहार र आवाज बनेर सद्भावना पार्टीका अध्यक्ष राजेन्द्र महतो उदाए । यस वर्ष महतोसँगै मधेस केन्द्रीत दलका नेताहरु चर्चामा रहे ।
सुवास नेम्वाङ
दुइटै संविधान सभाका अध्यक्ष सुवास नेम्वाङ यो वर्षका अर्का चर्चित व्यक्ति हुन् । पहिलो संविधानसभाको असफलताको भागिदार मानिएका नेम्वाङ दोस्रो सभाले संविधान जारी गर्दाका अध्यक्षका रुपमा रहे । संविधान जारी भएपछि अहिले पूर्वअध्यक्ष नेम्वाङ नेकपा एमालेको राजनीतिमा सक्रिय छन् ।
रामचन्द्र पौडेल
महाधिवेशनको पूर्वसन्ध्यामा सभापति सुशील कोइरालाको निधन भएपछि रामचन्द्र पौडेल नेपाली कांग्रेसको ‘संस्थापन पक्ष’का सभापतिका आकांक्षीका रुपमा अघि आए । तर, आफ्नै पक्षका नेताहरु मिलाउदा मिलाउदै सभापति उम्मेदवार बनेका उनी देउवासँग दोस्रो चरणको निर्वाचनमा पराजित भए । सँगै संसदीय दलको नेतामा पनि उनी पराजित भएपछि कांग्रेसमा रहेको ‘६०–४०’को भागबन्डा समाप्त भएको मानियो ।
बाबुराम भट्टराई
पूर्वप्रधानमन्त्री बाबुराम भट्टराई यस वर्ष एमाओवादी पार्टी फुटाएर चर्चामा आए । करिश्मा मानन्धरदेखि सरोज खनालसम्मका कलाकारहरुलाई आफ्नो पछाडि राखेर जब उनले नयाँ शक्तिको घोषणा गरे यसले ठूलो चर्चा पायो । ट्विटर र फेसबुकभरी बाबुरामको पक्ष विपक्षमा मतहरु प्रकट भए ।
नवयुग श्रेष्ठ
र नेपाली फुटबल टिम नेपाली राष्ट्रिय टिमले बंगबन्धु र यु–२३ टिमले सागमा स्वर्ण पदक जितेर यस वर्ष नेपाली फुटबलमा सफलताको बहार ल्याए । र, यी दुवै जितमा नवयुग श्रेष्ठले नायकत्व प्राप्त गरे । दुवै खेलमा ह्याट्रिक गरेका नवयुगसँगै विमल घर्तीमगर, अन्जन विष्ट, प्रकाश बुढाथोकी, अनन्त तामाङ, विकेश कुथु र विराज महर्जन पनि स्टारका रुपमा उदाए । निमा घर्ती मगर/फुपुल्हामु खत्री/गौरिका सिंह महिला शक्तिको बोलबाला रहेको यो वर्ष राजनीतिमा मात्र होइन, खेलकुदमा पनि महिलाको श्रेष्ठता सावित भयो । पदकको खडेरीका बीच दक्षिण एसियाली खेल (साग)मा पहिलो स्वर्ण पदक जितेर १६ वर्षिया स्कुले विद्यार्थी निमा घर्ती मगरले नेपालीको मन जितिन् । जुडोमा स्वर्ण जितेर फुपु ल्हामु खत्रीले चर्चा पाइन् । यस्तै, १३ वर्षिया गौरिका सिंहले सागमा एक्लै चार पदक जितेर सफलताको मानक खडा गरिन् ।
खुमबहादुर खड्का
अदालतले भ्रष्टाचारी ठहर गरेर जेल सजाय भोगेर निस्किएका खुमबहादुर खड्का यस वर्ष नेपाली कांग्रेसको महाधिवेशनसँगै चर्चामा आए । केन्द्रीय सदस्यमा दोस्रो धेरै मत ल्याए पनि उनको चर्चा पदाधिकारीमा जित्नेहरुको भन्दा बढी भयो । पार्टी कार्यकर्ताले सकारात्मक मत दिएको भए पनि उनको जितलाई धेरैले सकारात्मक रुपमा व्याख्या गरेको देखिएन ।
शशांक कोइराला/गगन थापा
कांग्रेस महाधिवेशनमा सभापतिका साथै महामन्त्रीको प्रतिस्पर्धा पनि चर्चित बन्यो । र, यसले मुख्य चर्चा पाए शशांक कोइराला र गगन थापाले । ‘संस्थापन’ प्यानलबाट उम्मेदवार बनेका शशांक विजयी भए । आफ्नै ससुरा अर्जुननरसिंह केसीविरुद्ध उम्मेदवारी दिएर तेस्रो बनेका गगन थापाले चर्चा भने उनको बराबरी पाए ।
प्रिन्स ह्यारी
बेलायती राजकुमार ह्यारी यो वर्षका अर्का ‘न्युजमेकर’ रहे । नेपालको ६ दिने औपचारिक भ्रमणमा आएका ह्यारीले बर्दिया निकुञ्जदेखि लमजुङका गाउँसम्मको भ्रमण गरे । भ्रमण लम्ब्याएका उनले गोरखामा भूकम्पले भत्काएको स्कुलको पुनर्निमाणमा संलग्न भएर नेपालीको मन जिते ।
दिनेश न्यौपाने/सन्तोष राना
नेपालगञ्जबाट जुम्लाका लागि उडेको एयर काष्ठमाण्डपको जहाज फागुन १४ गते कालिकोटको चिल्खयामा आकस्मिक अवतरणका क्रममा दुर्घटनाग्रस्त हुँदा यसका चालक दिनेश न्यौपाने र सन्तोष रानाले ज्यान गुमाए । दुर्घटनामा उनीहरु बाहेक यात्रीहरु भने जोगिए । आफू मरेर अरुलाई बचाउने पाइलटका रुपमा यी दुईको सम्झना भइरहनेछ ।
हरिप्रसाद पराजुली पराजुलीले
नाम होइन, बद्नामी कमाए । तर, पनि उनी चर्चित रहे । असार १५ मा खेत रोप्न मुलपानी पुगेका पराजुली आफ्नो हर्कतका कारण विवादित बने । हिलोमा छिरेका पराजुलीले स्थानीय महिलासँग गरेको व्यवहारले उनकै अनुहारमा हिलो छ्यापियो । मन्त्री पदबाट राजीनामा गरेर उनले त्यो हिलो पखाल्ने प्रयास गरे ।
लोकमानसिंह कार्की
अख्तियार दुरुपयोग अनुसन्धान आयोगका प्रमुख आयुक्त लोकमानसिंह कार्की आफ्नो नियुक्ती देखि नै निरन्तर चर्चामा छन् । आफैं जनआन्दोलनको दोषीका रुपमा सुचीकृत भए पनि कार्की नेतृत्वको अख्तियारले पूर्व प्रहरी अधिकारीहरुलगायत कर्मचारीलाई केही ठूलो भ्रष्टाचार मुद्दामा अदालत पुर्यायो ।
दयाहाङ राई
पछिल्लो समय मौलिकताको खोजी गरिरहेको नेपाली फिल्मको ‘पोस्टर ब्वाई’का रुपमा दयाहाङ राईको उदय सुखद् संकेतका रुपमा देखा परेको छ । ‘कबड्डी कबड्डी’ र ‘फन्को’जस्ता फिल्मबाट उनी यस वर्ष पनि चर्चामा रहे । यसबाहेक नेपाल बाहिर पनि उनको क्रेज देखियो । गत वर्षको ‘कबड्डी’बाट उनले राष्ट्रिय अवार्ड र क्रिटिक्स अवार्ड पनि पाए ।
खगेन्द्र लामिछाने
नाटकबाट फिल्ममा आएर सफल हुने कलाकारको सुचीमा खगेन्द्र लामिछानेको नाम थपियो । बधशाला र टलकजंग भर्सेस टुल्केजस्ता फिल्मबाट आफ्नो प्रतीभा देखाएका लामिछानेले यस वर्ष ‘पशुपति प्रसाद’मा झन् गहिरो छाप छोडे । यो फिल्मको निर्माता र पटकथाकारका रुपमा पनि उनी सफल रहे ।
अर्चना पनेरु ‘पोर्नस्टार’
बन्न चाहने किशोरीका रुपमा अर्चना पनेरु यो वर्षभरी चर्चामा रहिन् । उनलाई लिएर म्युजिक भिडियो र फिल्म बनाउनेहरु निस्किए । त्यस्तै मध्येका एक राजु गिरीले उनलाई फिल्ममा अनुबन्ध पनि गरे । तर, पोखरा प्रहरीले विनाअनुमति सुटिङ गरेर भनेर पक्राउ गरेपनि निर्देशकसँगै अर्चना पनि प्रहरीको ‘पाहुना’ बनिन् ।
0 comments
Write Down Your Responses